Nan yon nòt li fè sòti jodi mèkredi 16 jen an, Kòdonatè jeneral Konbit baz popilè pou evolisyon ak pwogrè à (KONBAPEP), James Nelson, denonse ak tout fòs li move plan ki kache dèyè sitin Abel Loreston ak alye yo anonse devan BMPAD pou jedi k ap 17 jen an, Msye Nelson tou pwofite raple pwotestatè yo ke Leta pa nan zafè achte gaz depi desanm 2021, se konpayi gaz yo ki jere sa konnya. Ki donk maladi yo soufri a se pa li yo di doktè a.
Redaksyon jounal Le Médiateur pibliye nòt la san wete san mete. Li envite w li l.
Nòt pou laprès
« Konbit bas popilè pou evolisyon ak progrè KONBAPEP sezi aprann kouman Abel Loreston, Etzer Jean-Louis ak Saint-Fleur Édouard mare sosis yo ansanm nan yon Òganizasyon bidon ki pote non EPOP, pou yo anonse yon sitin devan BMPAD yon mannyè pou y al denonse swadizan pwojè Diriktè jeneral BMPAD la, Fils-Aimé Ignace Saint-Fleur, genyen pou l al monte pri gaz la nan ponp yo.
KONBAPEP ap di Abel Loreston ak akolit li yo, li lè li tan pou yo sispann ak jan de pratik koken sa yo. Se avni politik yo y ap détwi. Ansyen minis Jonas Coffy te deja denonse Abel Loreston nan laprès lè l t ap mache fè sitin devan Ministè Komès kont lavi chè aprè l al nan biwo l ankachèt pou l mande 2 milyon goud pou l kanpe sitin nan. Li te fè l menm jan an devan BRH ak Inibank lè l t ap mande pou dola desann. Se pa menm Abel Loreston sa ki fin wè mò pou Premye minis Ariel Henry nome l majistra Pòtopwens lan ? Se pa li menm, ki prezante l kòm pòt pawòl ansyen senatè Moyiz Jan-Carles la, yon nèg k ap preche entegrite, k ap batay kont kòripsyon an ?
KONBAPÈP ap fini pou l di Leta pa byen prive M. Loreston. Li paka amize l l ap ransonnen dirijan l yo konsa pandan menm grès kochon an pa ka kwit kochon an. KONBAPEP ap pwofite raple, Leta ayisyen atravè Bmpad retire kò l nan achte gaz la depi mwa desanm 2021,se konpayi gaz yo ki yo menm achte gaz la konnya. Si se yon konplo Abel Loreston ak abolit ni yo ap fè pou yo jete Premye minis Ariel Henry pou meri Pòtopwens li pa ba yo a pou y al kraze a se pou yo di l klè. Si se menm politik ransonnay la y ap prepare ke yo parèt tout kò w. Paske yo wè yo deja.
