« Sa fè 13 mwa n ap mande Jistis pou Jovenel », se konsa ansyen Premye minis Laurent Lamothe tanmen yon mesaj li pibliye sou kont Twitter li jodi dimanch 7 jiyè a ki make yon lane, yon mwa depi yon gwoup asasen san fwa ni lwa te touye krabinen Prezidan Repiblik la, Jovenel Moïse, nan chanm lakay li, pandan l te kouche ak madanm li.
Ansyen chèf Gouvènman an sòti nan lane 2012 rive 2014 la, ki pa janm rate yon okazyon pou l mande Jistis pou Jovenel Moïse, te tou pwofite rès mesaj la pou l envite tout moun al li « Le rêve assassiné » yon liv ki detaye vizyon Prezidan an te genyen pou peyi a : « Si nou vle konprann vizyon Prezidan Jovenel Moïse, si nou ta renmen konnen sa li te vle fè pou peyi a, sa nou pèdi lè yo asasinen l la… mwen rekòmande nou pou nou li temwanyaj ki nan liv sa a « Le Rêve Assassiné ».
N ap raple liv sa a sòti anba plim plizyè kolaboratè Prezidan mati a, pami yo Emmanuel Jean-François, anyen Direktè kominikasyon l nan Palè nasyonal, …. Li disponib nan libreri Astérix ki chita nan Petyon-Vil, ang ri Gregwa ak Oje. Pri li se 2000 goud sèlman. Vant siyati a ap gen pou fèt nan lotèl Karibe nan dat k ap 10 septanm k ap vini la a.
Maryne Louis-Jeune
