Aprè l fin pouse do ansyen Senatè Kelly Bastien ak Simon Desras nan Sektè Demokratik la, Mèt Andre Michel fin kwè li se sèl towo gwonde nan opozisyon politk la. Msye koupe rache jan l vle nan Sektè Demokratik la, li kwè ke se sèl li ki konn li, li se pi gwo lidè. Li pa pran okenn pati politik nan opozisyon an menm pou po patat, menm pati ansyen Prezidan Jean-Bertrand Aristide la, Fanmi Lavalas ak pati ansyen Senatè Moïse Jean-Charles la ki se Pitit Desalines. Vin jwenn ansyen senatè Nènèl CASSY blije swiv msye tèt bese. Paske se Mèt la ki t ap defann kavalye pòlka l, ansyen DG BMPAD la, Patrick Norame, lò yo te fin souse manmèl bèf petwokaribe nan enstitisyon sa a sou prezidans Privert a (2016-2017). Epi ansyen minis Majorie Michel blije pliye anba volonte l. Paske, selon sa ki di, nan relasyon tiboubout, enterè youn se entèrè tout.
San l pa pwèt pou pati Fanmi Lavalas, Pitit Desalines elatriye, Mèt Andre Michel mete deyò kalandriye mobilizasyon l pou l al pran kontwòl Pouvwa tranzisyon li reve a.
Kesyon k ap poze, èske se moun ki te pran lari an 2004 ak Andre Michel pou chavire ansyen Prezidan Jean Bertrand Aristide, mètdam nan pral mobilize pou kapote Jovenel Moïse sou pouvwa a ?
Kilè Andre Michel ansyen GNBis jouk nan zo te gen tan lavalas konsa pou se li k ap deside jan l pi pito nan non ansyen Prezidan Jean-Bertrand Aristide, Maryse Narcisse,Yves Christallin,Yvon Feuillé, Moïse Jean-Charles, Kelly Bastien, Dieuseul Simon Desras… ?
Andre Michel sanble gen misyon pou l fini ak tout lidè ki de souch lavalas yo, aprè li fin batay pou l jete senbòl rejim Lavalas la, ansyen prezidan Jean Bertrand Aristide an 2004 sou pouvwa a ?
Èske Andre Michel gen tan bliye se 0% vòt li te fè nan eleksyon ki sot pase a pou prezidan, kidonk li pa gen pyès kapasite pou l fè mobilizasyon ?
Jan pwovèb la di a, sòt ki bay enbesil ki pa pran. Pandan Fanmi Lavalas mande yon gouvènman Sali piblik, Pitit Desalines mande yon prezidan nan kou Kasasyon pou ranplase prezidan Jovenel Moïse sou pouvwa a, André Michel pa mande yo sa yo pot pou vann. Pwojè pa l se vannen yo grenn pa grenn.
Edius Exilus,
Militan nan bouk
